Лукашэнка знайшоў сабе Балогу. І шэфа КГБ з Украіны
Пасьля магутнага выбуху на менскім канцэрце ў Дзень незалежнасьці 3 ліпеня, пра віншаваньне зь якім ад Віктара Юшчанкі прэсавая служба апошняга паведаміла аж 14-га ліпеня, Аляксандар Лукашэнка ўзяўся ператрахваць кадры.
Паляцелі з пасадаў кіраўнік прэзыдэнцкай адміністрацыі, сакратар рады бясьпекі, шэф КГБ. І вось – новыя прызначэньні.
Цяпер старшынём КГБ Беларусі будзе генэрал-маёр Вадзім Зайцаў, які нарадзіўся ў 1964 годзе ў Жытомірскай вобласьці.
Але мяне ўразіла іншае прызначэньне – беларускім Балогам стаў Уладзімер Макей. Цяпер у сьвеце ёсьць адзін кіраўнік прэзыдэнцкай канцылярыі, зь якім я на ты. Іншая справа, што ўжо гадоў восем мы не кантактуем.
Калі мы пазнаёміліся з Макеем у беларускім МЗС, я нават не падазраваў, што ён нарадзіўся ў 1958 годзе – такі ён быў увесь малады й прагрэсыўны. І вучыўся ён у аўстрыйскай дыпляматычнай акадэміі. Але толькі зараз я даведаўся, што ён у часы СССР служыў у вайсковай контрвыведцы ды палкоўнік запасу.
У 1996 годзе Ўладзімера Макея прызначылі прадстаўніком Беларусі ў Радзе Эўропы ў Страсбуры – ён адзін быў філіяй беларускай амбасады ў Францыі.
А ў студзені 1997 году мяне запрасіла ў Страсбур тагачасная старшыня ПАРЭ Лені Фішэр – бюро асамблеі мела вырашыць, што рабіць зь беларускім парлямэнтам пасьля зьмены Канстытуцыі на рэфэрэндуме ды яго фактычнага разгону.
Я быў адзіным журналістам зь Беларусі, якому Лені Фішэр адразу пасьля паседжаньня паведаміла навіну: бюро ПАРЭ вырашыла "прыпыніць, а не адклікаць статус спэцыяльнага госьця" для беларускага парлямэнту. Гэты прыпынак расьцягнуўся на 11 гадоў, а Беларусь – адзіная краіна Эўропы, якую не прынялі ў ПАРЭ.
І як жа я перадаў гэтую навіну ў Менск для незалежных СМІ? Напісаўшы яе на службовым кампутары Ўладзімера Макея ў ягоным службовым кабінэце ў страсбурскім Палацы Эўропы.
Вось так ён дапамагаў беларускай дэмакратыі. Але з 2000 году стаў памочнікам Аляксандра Лукашэнкі. А цяпер папрацуе беларускім Балогам. Прыблізна з такімі ж мэтамі й паўнамоцтвамі. Дзіўныя шляхі твае...
Блог автора – матеріал, який відображає винятково точку зору автора. Текст блогу не претендує на об'єктивність та всебічність висвітлення теми, яка у ньому піднімається. Редакція "Української правди" не відповідає за достовірність та тлумачення наведеної інформації і виконує винятково роль носія. Точка зору редакції УП може не збігатися з точкою зору автора блогу.
